Search
Thursday 19 October 2017
  • :
  • :

நடிகர் சங்க பொதுக்குழு கூட்டத்தில் பங்கேற்க உறுப்பினர்களுக்கு அழைப்பு

தென்னிந்திய நடிகர் சங்கத்தின் 64-வது பொதுக்குழு கூட்டம் வருகிற அக்டோபர் 8-ம் தேதி (ஞாயிறு) மதியம் 2 மணிக்கு சென்னை அண்ணா சாலையிலுள்ள காமராஜர் அரங்கில் நடைபெற இருக்கிறது.

இதற்கான அழைப்பு சங்க உறுப்பினர்கள் அனைவருக்கும் அனுப்பி வைக்கப்பட்டுள்ளது. இந்த பொதுக்குழு கூட்டத்தில் சங்க உறுப்பினர்களான முன்னணி நடிகர் நடிகைகள், மூத்த நாடக மற்றும் திரைப்பட நடிகர் நடிகைகளும் என பலரும் கலந்து கொள்கிறார்கள்.

நடிகர் சங்கத் தலைவர் நாசர் தலைமையில் நடைபெறும் இந்த கூட்டத்தில் பொதுச் செயலாளர் விஷால் வரவேற்புரை நிகழ்த்த இருக்கிறார். துணைத் தலைவர் கருணாஸ் 2016-2017-ஆம் ஆண்டுக்கான ஆண்டறிக்கை மற்றும் தணிக்கை செய்யப்பட்ட வரவு, செலவு கணக்குகளை வாசித்து ஒப்புதல் பெறுவார்.

பொருளாளர் கார்த்தி எதிர்கால பொருளாதார திட்டமிடல் பற்றிய விளக்க உரை நிகழ்த்த உள்ளார். அதனைத் தொடர்ந்து சங்கத்தின் கடந்த கால செயல்படுகள் மற்றும் எதிர்காலத் திட்டங்கள் பற்றி பொதுச் செயலாளர் விஷால் விளக்கி கூட்டத்தில் ஒப்புதல் பெறுவார்.

அதனைத் தொடர்ந்து நாசர் தலைமை உரையாற்றுவார். துணைத் தலைவர் பொன்வண்ணனின் நன்றி உரையுடன் பொதுக்குழு கூட்டம் நிறைவு பெறும்.

இந்த பொதுக்குழு கூட்டத்தில் சங்க உறுப்பினர்கள் அனைவரும் தங்களது உறுப்பினர் அடையாள அட்டையுடன் வந்து தவறாமல் பங்கேற்க வேண்டுமென்றும் தென்னிந்திய நடிகர் சங்க நிர்வாகம் வேண்டுகோள் விடுத்துள்ளது.